'സ്നേഹസദനം' ഭവന പദ്ധതി: കോന്നിയിൽ താക്കോൽദാനം നടന്നു

കോന്നി, പത്തനംതിട്ട – 2026 ആഗസ്റ്റ് 30 – യു.എ.ഇ-യിലെ പ്രവാസി മലയാളികളുടെ പ്രമുഖ സാമൂഹിക-സാംസ്കാരിക സംഘടനയായ ഷാർജ മലയാളി സമാജം (SMS) തങ്ങളുടെ ജീവകാരുണ്യ പ്രവർത്തനങ്ങളിൽ മറ്റൊരു നാഴികക്കല്ല് കൂടി പിന്നിട്ടു. സാമൂഹിക സേവനത്തിന്റെയും സാംസ്കാരിക പ്രവർത്തനങ്ങളുടെയും ഇരുപതാം വാർഷികം ആഘോഷിക്കുന്ന വേളയിൽ, സമാജത്തിന്റെ 'സ്നേഹസദനം' ഭവന നിർമ്മാണ പദ്ധതിയുടെ ഗംഭീരമായ താക്കോൽദാനവും ഗൃഹപ്രവേശവും കോന്നിയിലെ അരുവാപ്പുലത്തിൽ നടന്നു. ചടങ്ങിൽ വെച്ച് ശ്രീ. ഉത്തമൻ കെ-യ്ക്ക് പുതിയ ഭവനം കൈമാറി.വിശിഷ്ടാതിഥികളുടെയും നാട്ടുകാരുടെയും സാന്നിധ്യത്തിൽ ഷാർജ മലയാളി സമാജം പ്രസിഡന്റ് ശ്രീ. പുഷ്പരാജ് ആതവനാട് റിബൺ മുറിച്ച് വീടിന്റെ ഉദ്ഘാടനവും താക്കോൽദാനവും നിർവ്വഹിച്ചു.പത്തനംതിട്ട എം.പി ശ്രീ. ആന്റോ ആന്റണി ചടങ്ങിൽ മുഖ്യാതിഥിയായി പങ്കെടുത്തു. അദ്ദേഹം വീടിന്റെ നാമഫലകം അനാച്ഛാദനം ചെയ്യുകയും ഭവനത്തിന് 'സ്നേഹസദനം' എന്ന് ഔദ്യോഗികമായി നാമകരണം ചെയ്യുകയും ചെയ്തു.അരുവാപ്പുലം ഗ്രാമപഞ്ചായത്ത് പ്രസിഡന്റ് ശ്രീമതി. രേഷ്മ, വൈസ് പ്രസിഡന്റും വാർഡ് മെമ്പറുമായ ശ്രീ. ശ്രീകുമാർ തുടങ്ങിയ ജനപ്രതിനിധികൾ ചടങ്ങിൽ പങ്കെടുക്കുകയും ആശംസകൾ അർപ്പിക്കുകയും ചെയ്തു. ശ്രീ. വിനോദ് ബാഹുലേയൻ (ട്രഷറർ), ശ്രീ. എബ്രഹാം ചാക്കോ (എക്സിക്യൂട്ടീവ് അംഗം) എന്നിവർ ചടങ്ങിൽ പ്രസംഗിച്ചു. കോൺട്രാക്ടർ ശ്രീ. സുരേന്ദ്ര കുമാർ കെ-യ്ക്ക് (കൊളോണിയൽ വാസ്തുക്) സമാജത്തിന്റെ വകയായി പ്രത്യേക സ്നേഹോപഹാരം ചടങ്ങിൽ കൈമാറി.ഷാർജ മലയാളി സമാജം ഭാരവാഹികളും അംഗങ്ങളുമായ ശ്രീ. വിനോദ് ബാഹുലേയൻ (ട്രഷറർ), ശ്രീ. ബിബിൻ കൃഷ്ണൻ (വൈസ് പ്രസിഡന്റ്), ശ്രീമതി. പുഷ്പലത പുഷ്പരാജ് (വനിതാ സമാജം പ്രോഗ്രാം കോർഡിനേറ്റർ), ശ്രീ. എബ്രഹാം ചാക്കോ (എക്സിക്യൂട്ടീവ് അംഗം), ശ്രീ. അബ്ദുൾ വാഹിദ് (സമാജം അംഗം), ശ്രീ. റെനി എബ്രഹാം (വനിതാ സമാജം അംഗം), ശ്രീ. മാത്യു സി. സാമുവൽ (സമാജം അംഗം) എന്നിവരും ചടങ്ങിൽ സന്നിഹിതരായിരുന്നു:കേരളത്തിലെ അർഹരായ കുടുംബങ്ങളെ കൈപിടിച്ചുയർത്തുന്നതിൽ കഴിഞ്ഞ രണ്ട് പതിറ്റാണ്ടായി ഷാർജ മലയാളി സമാജം തുടരുന്ന അചഞ്ചലമായ പ്രതിബദ്ധതയുടെ നേർക്കാഴ്ചയാണ് സ്നേഹസദനം പദ്ധതി.

സ്നേഹസദനം ഭവനപദ്ധതി താക്കോൽദാനം - ഓഗസ്റ്റ് 30

ഷാർജ: പ്രവാസി കൂട്ടായ്മയായ ഷാർജ മലയാളി സമാജത്തിന്റെ (SMS) ജീവകാരുണ്യ പ്രവർത്തനങ്ങളുടെ ഭാഗമായി നിർമ്മിച്ചു നൽകുന്ന ‘സ്നേഹസദനം’ ഭവനപദ്ധതിയിലെ ഭവനത്തിന്റെ താക്കോൽദാനം ഓഗസ്റ്റ് 30 ഞായറാഴ്ച നടക്കും. കോന്നി അരുവാപ്പുലം പുളിഞ്ചാനിയിലെ വാഴവിള മേത്തേതിൽ ഉത്തമൻ കെ.-യ്ക്കാണ് സമാജം ആദ്യ ഭവനം നിർമ്മിച്ച് നൽകുന്നത്. 2006-ൽ ഷാർജയിൽ രൂപീകൃതമായ ഷാർജ മലയാളി സമാജം, ജാതി-മത-രാഷ്ട്രീയ ഭേദമന്യേ തികച്ചും സേവനമനസ്സോടെ പ്രവർത്തിക്കുന്ന ഒരു പ്രവാസി സാംസ്കാരിക സംഘടനയാണ്. ഇന്ന് നാനൂറ്റമ്പതിലധികം കുടുംബങ്ങൾ ഈ പ്രസ്ഥാനത്തിൽ അംഗങ്ങളാണ്. സമാജം നടപ്പിലാക്കിവരുന്ന ‘കാരുണ്യ’ പദ്ധതിയുടെ തുടർച്ചയായാണ് ‘സ്നേഹസദനം’ ഭവനപദ്ധതി വിഭാവനം ചെയ്തിരിക്കുന്നത്. നിർധനരായ രോഗികൾക്കുള്ള ചികിത്സാ സഹായം, കൃത്രിമ കാൽ വിതരണം എന്നിവയ്ക്ക് പുറമെ പ്രളയ-കോവിഡ് മഹാമാരി കാലത്തും സമാജം സജീവമായ ദുരിതാശ്വാസ പ്രവർത്തനങ്ങൾ കേരളത്തിൽ നടത്തിയിരുന്നു.പ്രവാസ ലോകത്തെ നന്മയുടെയും സഹകരണത്തിന്റെയും പ്രതീകമായി പൂർത്തിയാക്കിയ ഈ സ്നേഹഭവനത്തിന്റെ സമർപ്പണ ചടങ്ങിൽബഹു. പത്തനംതിട്ട MP ശ്രീ. ആന്റോ ആന്റണി, ബഹു. കോന്നി MLA ജനീഷ് കുമാര്‍, അരുവാപ്പുലം പഞ്ചായത്ത് പ്രസിഡണ്ട് ശ്രീമതി. രേഷ്മ, വാര്‍ഡ്  മെമ്പര്‍ ശ്രീകുമാര്‍ എന്നിവർ പരിപാടിയില്‍ പങ്കെടുക്കുമെന്ന് ഷാർജ മലയാളി സമാജം പ്രസിഡന്റ് ശ്രീ പുഷ്പരാജ് ആതവനാട്, ജനറൽ സെക്രട്ടറി ശ്രീ ഷെറിൻ ചെറിയാൻ, ട്രഷറർ ശ്രീ വിനോദ് ബാഹുലേയൻ, കാരുണ്യ കൺവീനർ ശ്രീ ജിജോ പുളിക്കൻ എന്നിവർ അറിയിച്ചു.